La Fèsta de la Musica es un eveniment cultural internacional que se debana cada an lo 21 de junh dins un centenat de païses del Mond, coïncidissent pauc o pro amb lo solstici d’estiu —un pauc coma la fèsta tradicionala de Sant Joan, mas sens fuòc e amb de concèrts de musica amplificada sus d’emponts. Foguèt lançat oficialament a París pel ministre francés de la cultura Jack Lang en 1983, après una primièra edicion l’an precedent. Repreniá l’idèa del musician american Joel Cohen, que ja èra estada mesa en practica un primièr còp en 1976 a Tolosa.
 
Per las festivitats d’ongan, la cadena de television francesa France 2 a anonciat en genièr passat que difusarà un grand concèrt que se debanarà sus la plaça del Capitòli de Tolosa. Aqueste 21 d’abril passat, la comuna de Tolosa a fach public que, per de rasons de seguretat, l’accès a la plaça serà restrench a las personas que se seràn inscrichas a l’avança per Internet. Sul sit de la comuna, se pòt legir que “dins l’encastre del plan Vigipirate de vigilància refortida, la Plaça del Capitòli serà barrada lo 21 de junh de ser e son accès serà reservat exclusivament a las personas acreditadas per l’eveniment. Coma lo nombre de plaças es limitat, per participar al concèrt, se cal preïnscriure en linha, a partir del 3 de mai de 2016 a 14 h. Es possible de reservar doas plaças maximum per internauta. Las acreditacions son estrictament personalas e non se poiràn ni escambiar ni cedir. Lo nombre de plaças es limitat. Los enfants de mens de 13 ans devon èsser acompanhats per un adulte.”
 
L’endeman d’aquesta nòva, un collectiu tolosan s’es creat sus Facebook jol nom de “Culture à Toulouse, vite reviens!” (Cultura a Tolosa, lèu, torna!) per se manifestar contra aquela restriccion. Lo collectiu crida a boicotar la Fèsta de la Musica de Tolosa: sus la pagina d’un eveniment de Facebook previst pel 3 de mai, convidan lo mond a s’inscriure sul sit de la comuna de Tolosa e a anar pas sus la Plaça del Capitòli lo jorn de la fèsta. Segon lo collectiu, “qu’òm aime o non la musica que i serà difusada, privatizar, quitament a títol gratuit, aquela plaça, es pas convenent e va pas dins lo sens d’un accès a la cultura pel mai grand nombre. A mai, la fèsta de la musica deu tanben èsser una fèsta de la descobèrta en metent endavant de grops locals e emergents. Nòstra vila a d’innombrables talents, donem-lor la plaça que meritan.”